जलस्रोत तथा सिँचाइ विभागका महानिर्देशक दिनेश रजौरिया र सुनकोशी–मरिण डाइभर्सन बहुउद्देश्यीय आयोजनाका निर्देशक कृष्णप्रसाद रिजाललाई प्रहरी परिचालन गरी प्रधानमन्त्री तथा मन्त्रिपरिषद कार्यालयमा उपस्थित गराइएको छ।
काठमाडौं उपत्यकाबाहिर रहेका उनीहरूलाई बिहीबार प्रहरीले नियन्त्रणमा लिएको थियो। त्यसपछि शुक्रबार प्रधानमन्त्री कार्यालय उपस्थित गराइएको हो।
प्रहरी स्रोतले दुवै जनालाई बिहीबार नियन्त्रणमा लिएर शुक्रबार प्रधानमन्त्री कार्यालयमा उपस्थित गराएको पुष्टि गरेको छ।
प्रधानमन्त्री कार्यालयले भने उनीहरूलाई पक्राउ वा नियन्त्रणमा नलिएको दाबी गरेको छ।
प्रधानमन्त्री कार्यालयका एक अधिकारीका अनुसार आयोजनाको प्रगतिबारे केही विषय बुझ्नुपर्ने भएकाले उनीहरूलाई कार्यालयमा बोलाइएको हो।
'उहाँहरू अहिले प्रधानमन्त्री कार्यालयमै हुनुहुन्छ। उहाँहरूसँग केही विषय बुझ्नुपर्ने भएकाले झिकाएका हौं,' ती अधिकारीले सेतोपाटीसँग भने, 'बाहिर आएजस्तो पक्राउ गरिएको होइन।'
उनीहरूको खोजीका लागि प्रहरी परिचालन गरिएको भने प्रधानमन्त्री कार्यालयले स्वीकार गरेको छ।
ती अधिकारीका अनुसार रजौरिया र रिजाल यसअघि प्रधानमन्त्री कार्यालयको सम्पर्कमै थिए। तर पछिल्लो समय फोन बन्द गरेर सम्पर्कविहीन भएपछि उनीहरूको खोजीका लागि प्रहरीलाई पत्राचार गरिएको थियो।
'पहिले उहाँहरू हाम्रो सम्पर्कमै हुनुहुन्थ्यो। तर पछिल्लो समय फोन अफ गरेर सम्पर्कविहीन हुनुभयो,' स्रोतले भन्यो, 'त्यसपछि हामीले प्रहरीलाई उहाँहरूको अवस्था बुझ्न पत्राचार गरेका हौं।'
प्रहरीले बिहीबार उनीहरूलाई फेला पारेको र राति होटलमा बसेर शुक्रबार काठमाडौं आएको प्रधानमन्त्री कार्यालयको भनाइ छ।
'उहाँहरू हिजो फेला पर्नुभयो। राति होटलमै बसेर आज काठमाडौं आउनुभएको हो। पक्राउ वा नियन्त्रण गरिएको छैन,' स्रोतले भन्यो।
प्रहरी स्रोतले भने उनीहरूलाई नियन्त्रणमै लिएर प्रधानमन्त्री कार्यालयमा उपस्थित गराइएको दाबी गरेको छ।
उनीहरूलाई नियन्त्रणमा लिनुपर्ने अवस्था किन आयो र आयोजनाको प्रगतिसम्बन्धी कुन विषयमा स्पष्टीकरण खोजिएको हो भन्ने खुलिसकेको छैन।
